Luk 9 | ASO | STEP | Izesu' aza izipahala zuho tuvelu nene vise lo do nubo o-ngedo evene' lu'ninguti' sikalahu' goloso vai' nene ngimisele hulaa' amuzo atoli'minesi ido' inite' gizi dave di lamine' i-ngidiliza amuzo nesi nene ngimine'.

Luke 9

Izesu' Izipahala Zuho Tuvelu (12) Mono' Gonolo' nGimiseline'

(Mataio' 10:5-15; Maleko' 6:7-13)

1 Izesu' aza izipahala zuho tuvelu nene vise lo do nubo o-ngedo evene' lu'ninguti' sikalahu' goloso vai' nene ngimisele hulaa' amuzo atoli'minesi ido' inite' gizi dave di lamine' i-ngidiliza amuzo nesi nene ngimine'. 2 Ne'mine ogo O'moso'mo gizebo o-ledelingumu' gamazi lamine' nene li-ngimaa' ilizave lo ido' inite' gizi dave nene di lamine' i-ngidaa' ilizave lo ngimiseline'. 3 Nongimiselo ti' lo lo-ngidine': Aka vilizada nene inite' mo di vamilo. Hatuso nesi di vami ido' gokisi nene di vami ido' beleti nesi nene dami ido' monisi nene go'zi di vami ido' sioti nesi nene sita' izi vami hamokovo' izikisa vilo. 4 Ido' lingine nene vi numuno mau' nidizi ma nene a'mine numungu' nene ingi'mi nivi viliza gameneu' nene vilo. 5 Ido' numuno malo' nivavo lengele'mize lamine' amavo ma nene lingine a'mine numuno ebe' huli vilisa niigi ma nene ingine engi' monovo'ine gililizangumu' ve li avazaha igi gizedidoti' u'musupo nene okoho' izi di huli vilo. 6 Ne'mine lo-ngedavo ingine nene vi numuno ebe' ngomo ngomou' ido' ebe' mukiku' nene mono' gamazi li-ngimi' ngimi' igi inite' gizi dave di lamine' i-ngidi'mi vani' ve.

Izesu' Monovomu' Helode' Giline'

(Mataio' 14:1-12; Maleko' 6:14-29)

7 Ne'mine i'mi nivavo guvelesi ve naba Helode' aza Izesu' gono've do ogo molo ine' initekumu' nene gelo gopo gala giline'. Gopo gala giline' nene ve malite mono' noso holo-ngedaa' ive Zohane' nene hilinguti' gohi otosa ne'mine neive nilavo 8 ido' malite nene polohete Elia' ma nene gohi soto' ogave li nilavo ido' ma nete nene gomu' polohete linge minani' mauti' ma vele gizo gohi oto ne'mine gono nodave li nilavo 9 Helode' aza gelo ti' lo line': Zohane' nene luvono gitekuvoni' ma neine'za ido' gamazi've nogiluve mene zaho nolive line'. Ne'mine lo a'mine Izesu'ni nene ningelesa giline'.

Izesu' Evene' Faef Tauseni (5,000) Ne'mine Noso' Nite' nGimine'

(Mataio' 14:13-21; Maleko' 6:30-44; Zohane' 6:1-14)

10 Ido' aposolo ingine mono' gonolo' ngimiselidoti' nene tine' mili igi inite' igi mili monani' nemu' nene Izesu'ni vetete' igi li-imani'. Ne'mine ikevo evene' linge ma nene huli-ngidi Izesu' nene izipahala zuho ngele'mizo gililihe' ivo vi numuno ebe' ma gulive Betesaida nela vi hetelani'. 11 Evene' muki' ingine Izesu' vine' nemu' gili e'meti vani'. E'meti nivavo aza ngele'mize lamine' ogo O'moso'mo gizebo o-ledelingumu' gamazi lamine' nene lo-ngemaa' ido' inite' gizi dave ado' di lamine' i-ngidiliza akalo' mini mili minave nene do lamine' o-ngedaa' ine' ve.

12 Ne'mine neivo ho' nene lemo voo nivenga' nomolavo izipahala zuho tuvelu ingine Izesu' neida igi ti' li li-imani': Laza ebe' hadivelo' mene none' nenako nemu' evene' nene ngimisele hulovo. Ingine nene mevola mini'mi monani' luhuvo numungu' nehe haza numuda nehe vi noso' nite'ine meni hizi naa' ido' ingaa' ilizangisi. 13 Ne'mine lani'za aza ti' lo lo-ngimine': Lengi' nene noso' nite' di ngimilevo. Ne'mine lavo ingine ti' li lani': Laza nene sikoni faef (5) ido' alaha' sita' a'nevo' molo none' nenako evene' muki' memu' nene gohi ma vo hizelesune lo nolabe. 14 Ne'mine lani' nene ve faef tauseni (5,000) ne'mine minani' nenako nemu' nene lani' ve.

Ne'mine likevo Izesu' izipahala zuhomu' ti' lo line': Evene' nene fifti fifti (50) ne'mine ve hizi guviselo' nene mito' minilizave li li-ngidilizave lo lo-ngidine'. 15 Ne'mine lavo izipahala zuho ingine Izesu' lido' lido' igi evene' nene di lisihe' i-ngidikevo vaito' nene mito' minani'. 16 Nizavo sikoni faef nesi alaha' sita' nesi nene do Okulumota vonu' noogo O'moso opo'ni lo a'mine noso' nite' nene gito apilo izipahala zuho nete ize' mili evene' ngimilizave lo ngemavo moni ngimani'. 17 nGimikevo evene' mukito' ni gatu'ine ani'. Ne'mine ikevo izipahala zuho ingine lumo sama minine' nene gosuvaha' tuvelu (12) ne'mine go'zi vai' lani' ve.

Petolo' Aza Izesu' Nene O'moso'mo Do Lu' Izelive Lo Do Kegese-do Imiselelesa Live Ne Neive Line'

(Mataio' 16:13-19; Maleko' 8:27-29)

18 Gamene ma Izesu' aza eikovo' O'mosola lo neivo izipahala zuho nesi maka' imi nizavo ti' lo longo' o-ngidine': Evene' nete nenikumu' nene zaho ve li laa' nave. 19 Ne'mine lavo izipahala zuho ingine ti' li li-imani': Evene' linge ma nete nene mono' noso holo-ngedaa' ive Zohane' nene hilinguti' otosa oloseive li laa' nave. Ido' linge ma nete nene gozopo' polohete Elia' aza gohi soto' oloseive lave ma nene tine' molo abe li laa' nave. Ido' ma nete nene gomu' minani' polohete hilani' linge engikuti' otanive nolibe li laa' nave. 20 Ne'mine likevo Izesu' gohi ti' lo longo' o-ngidine': Ido' ingine nene mo ne'mine laa' nani'za lingine nenikumu' nene zaho neve li laa' nave. Ne'mine lavo Petolo' aza ti' lo lo-imine': O'moso'mo do lu' izeline lo do kegese-gedo gimiselelesa live ma nene nane. 21 Ne'mine lo line'za Izesu' aza ne'mine li evene' hamokisi li-ngimamilizave lo o'ove lo lo huko-ngidine'.

Izesu' Aza Bili Hililizani' Gamazi Lo-ngemosa Ve Ma Eze E'meti Nivi Mulumo Gono Gihilizangu' Olovo' Ilizado' I Minave Nene Minevo' Minevo' nGemeni Ma Damilisave Line'

(Mataio' 16:20-28; Maleko' 8:30-9:1)

22 Ido' Izesu' aza neni' nene do lungu' izelongumu' do kegese-nedo O'moso'mo nimiselelesa live neive li evene' hamokisi li-ngimamilizave lo lo huko-ngedo ti' lo lo-ngimine': Neni' gono ne'mo gihile've do soto' ilingumu' O'mosolati' ve gihile neni' nene mulumo gono naba geho helosa gohi otelodo' o neine' nenako mono' gizebo vesi ido' eveneto' medeli mini O'moso inite' lehizi-daa' ave nabasi ido' Zuda vete mono' gozopotati' laa' ani' apizi ngimaa' avesi ingine mehe'ine nimi mulumo inite' muki' nimi nibili hililisave. Ne'mine ikevo galeseu' lemo gamene sitohamo minekuvo O'moso'mo gohi do ote-nedeleseive.

23 Ne'mine lo evene' muki' nene ti' lo lo-ngimine': Ve ma ingine ne'meto alone li gilii ma gomu' nene engi' minevo' alevo'ine gizebo iga' nani' monovo'ine nene huli alami neni' ne'metilizangumu' ve goloso nizave li lohoto' zalo' ngibili hililizangumu' nene gamene gamene gili hulisa ne'meti alizave. 24 Ido' ne'mine igisa ne'meti alizave lo noluvoni' nene nanitekumu' luhe. Lingine mene gililo. Ve ma ingine neni' ne'metelone' nene geni initeli'mi lulou' vo minevo' alevote hulalone li ne'metamilizave nene minevo' minevo' minaa' ngemeni dameni nene ma damilisave. Damilisaha ve ma ingine ne'meti vilizangu' ngibili hilikevo minevo' alevo'ine hulilizani' nene alinge' minevo' minevo' ngemeni dameni dalisave. 25 Ee, misubouko mene minevo' alevo' igi mini misubou' inite' vai' nene di engita igi minilizangu' nene minevo' minevo' minaa' ngemeni'ine hulilizahe vo tolovo ilihe iline' nene a'mine inite' vai' nete nene ma hize ele' i-ngidamilisave. 26 Ido' me misubou' minevo' alevo'inemu' gili neni' ne'metamilizave ingine minevo' minevo' ngemeni ma damilisave noluvoni' nene ve ma ingine libilikevo minevo' alevote hulalone li neni' evenele none lilisa ngovozo hililizani' nene O'mosolati' ve gihile naza labanalasi amuzo'nesi ido' me'nehi amuzosi ido' ei' angelo'veti amuzosi nene do mino aloni' gamenela a'mine alevemu' nene neni' evene'ne nizave lolosa ingine adi'mino novozo helo lamuvo minevo' minevo' ngemeni dameni nene ma damilisave. 27 Naza lamineto' ma lo-lengemelove: Melo' nizave lengikuti' nene linge ma hilami ha nizavo O'moso'mo gizebo o-ledaa' monovo nene soto' ogavo ningilisave.

Izesu' Oko'no Do Atoli'mine Ine'

(Mataio' 17:1-8; Maleko' 9:2-8)

28 Izesu' aza a'mine gamazi lo-ngimidoti' gamene eiti (8) ogo vavo O'mosola lolosa Petolo'ni ve Zohane'ni ve Zakobo'ni ve nene ngele'mizo gololo' dizo vine'. 29 nGele'mizo dizo O'mosola lo neivo golo vele nene do atoli'mine lolo' noo-divo genegana'veloti' nene mokono' hego hego lo minine'. 30 Ne'mine neivo Okulumokuti' limi asine' nene ve sita' ma Izesulesi gamazi li volelo' melo' igi minani' nene Moseki Eliaki minasine' ve. 31 Ingine nene labana'ine atoli'minesi soto' igi mini Izesu' Zelusalemi numuda heleline' ne'mo O'moso'mo imine' gono nene do pelo me misubo hulo dizo viline' nemukisi nene li volelo' melo' ani'. 32 Ne'mine li nilavo Petolo' ve Zohane' ve Zakobo' ve ingine nene ve'ine hihi' ogavo mo ingalisa gilani'za ingami ha oti mini Izesu' labanala nene ningisa ido' ve sita' nesi maka' oti minasine' nene ningani'. 33 Ido' ve sita' nene Izesu'ni huli-di nivasivo Petolo' ti' lo lo-imine': Ve naboo, maka' melo' minune' nene lamine' ogave. Nemu' nene melo' azibe sitohamo ma gizelone. Ma nene gei' ve ido' ma nene Mose'ni ve ido' ma nene Elia'ni ve. Ne'mine line' nene nadive noluhe lo gelamo gopo gani line' ve.

34 Petolo' aza ne'mine nolivo limusoli'mo ogo molo hite-ngidine'. Molo nohite-ngidivo limuso lulou' halekani' nemu' ngehelele izine'. 35 Ne'mine neivo limuso lulouti' O'moso'mi gamazi ma ti' lo soto' ine': Meve nene neni' gipe'ne do lungu' izelive lo do kegese-de nouvoni' nenaze. Lingine eze gamazi've gili dalo. 36 Ne'mine lo limusouti' lavo izipahala zuho sitohamo ingine Izesu' nene eikovo' neivo ningani'. Ido' ingine a'mine ningani' inite' nene evene' hamokisi li-ngimami legene' iki ha nizavo gamene ha'na gidini vine' ve.

Izesu' Aza Sikalahu' Goloso Lulou' Minine' Gipe Ma Do Lamine' O-dine'

(Mataio' 17:14-18; Maleko' 9:14-27)

37 Ne'mine igi mini go' lavo gololati' limi navo evene' muki' nene Izesulesi votene' ani'. 38 Votene' navo a'mine evene' muliseuti' ve mali'mo geke' lo ti' lo line': Tisazoo, neni' gipe'ne hamo' gehepeve mene ninge-deline lo geita noluve. 39 Eze nene sikalahu' goloso mali'mo do ote-davo upuho' ogo geke' naba lavo sikalahu' goloso ne'mo gohi do upuho' o-davo ahezeve izo neivo vele lavozo ogo gituho' galakala' ogo neivo sikalahu' goloso nene a'manapa ogo hulo-do vamolosa inguti' hulo-do vavo oko'no malalapa izo minavo amuzolo nomivo minaa' neive. 40 Naza izipaha zuho nete sikalahu' goloso nene imiseli hulilizave lo engita luvoni'za ingine nene ngeli imiseli hulilizado' minamani' ve. 41 Lavo Izesu' aza a'mido' ti' lo line': Eii, ngeli imiseli hulisa'mani' nehe lingine O'mosomu' gili ele'vole' amani' zuho lutine zovo' ize vine' mene lengikumu' gosele' nebele'mo novivo lengi' vovotingu' gamene gohi ma imine' molo mino langamuzo hize'mo vo mineloni' nemu' nene agae lo noluve. Ne'mine lo gipa nene ele'mizo ano lavo 42 ele'mizi ikevo a'mine izipe olihe navo sikalahu' goloso ne'mo ehuso' o hulavo lemo pou' lo ongo neivo do gabe' kabe' o-divo ahezeve izo minine'. Ne'mine o-dine'za Izesu' aza sikalahu' goloso nene elemo izipe nene do lamine' o-do melehine gohi do imine'. 43 Ne'mine ogavo evene' muki' ingine O'moso'mi amuzo atoli'mine goloso nene ningi upuho' goloso ani' ve.

Izesu' Heleline' Gamazi Gohi Lo Soto' O-ngimine' Gamazi

(Mataio' 17:22-23; Maleko' 9:30-32)

Ido' Izesu' ogo molo ine' inite' muki' nemu' evene' nene vo'ine vavo gopo ga'ine ha gili nizavo Izesu' aza izipahala zuho ti' lo lo-ngimine': 44 Gamazi mene loloni' nene lingine mili gatingu' iki gili minilo. Ado' O'mosolati' ve gihile neni' nene nibililizani' eveneliti a'ningu' nele'mizi milalisave. 45 Ne'mine lo line'za a'mine gamazi'mi monovo geti gilikelizave lo O'moso'mo ga'ine do ngolo' lo-ngedamivo a'mine gamazi ne'mi monovo nene gili lamine' amani' nenako nemu' nene a'mine gamazimu' longo' i-dilisa ngehelele izine' ve.

Evene' Naba Minaa' Monovomu' Nene Izesu' Lo-ngimine' Gamazi

(Mataio' 18:1-5; Maleko' 9:33-37)

46 Ne'mine igi izipahala zuho ingine lelikuti' nene zaho livile' ogo dizosa nolive li nemu' gamazitunu' lovo no'ningu' ani'. 47 Ne'mine igi lolize gamazi nilavo Izesu' aza lu'ningu' gilani' nene mo ningo gelo izipe ngomo ma ele'mize do ogo minida do ote-do 48 ti' lo lo-ngimine': Ve ma ingine nenikumu' ve li izipe ngomo me'mine ma ngele'mize lamine' ilizani' nene neni' nele'mize lamine' ani' geleleseive. Ido' ve ma ingine neni' ma nele'mize lamine' ilizani' nene nimiselive O'moso nene ele'mize lamine' ani' geleleseive. Nemu' nene O'moso'mo gilivo lengikuti' mali'mo eikumu' neni' nene lemo nouve lo gele nolive ne'mo lengi' nene lingivile' ogosa mineleseive.

Ve Ma Biluva' I-lidamilizave Nene Lelita Ve Ne Nizave Lo Lo-ngimine'

(Maleko' 9:38-40)

49 Ne'mine lavo a'mido' Zohane' aza ti' lo lo-imine': Ve nabazo, ve mali'mo gei' guliveka lo soto' ogo gei' vekamu' ve lo sikalahu' goloso nongimiselivo laza ningo a'mine ve nene lezesi bizo gei' ge'metesa'mine' nenako nemu' ne'mine amozo lo o'ove lo-dekune. 50 Ne'mine lo line'za Izesu' aza ti' lo lo-imine': Ve ma ingine biluva' i-lidamilizave nene lelita ve nene nizaze. Nemu' lingine o'ove li-damilo line' ve.

Samalia Aleve Linge Izesungine Ningi Gosele' i-ngidani' Gamazi

51 Izesu' nene O'moso'mo mo Okulumokuko gohi ele'mizo dizeline' gamene alitavo mo Zelusalemi numuno ebeta volosa amuzo molo giline'. 52 Ido' ne'mine ogosa ei' vilingumu' gamazi di gomu' vilizave ma ngimiseline'. nGimiselavo ingine Samalia alevetingu' numuno ebe' mau' vi numuno di lisihe' i-dilisa ani'za 53 a'mingu' aleve nete Izesu' aza engikisi bizisa'mani' aleveti numuno ebe' Zelusalemi numuno ebeta volosa ingumu' nene eze ele'mize lamine' amolosune lani'. 54 Ne'mine likevo izipahala zuhouti' ve sita' ma Zohaneki Zakoboki ingine ne'mine lani' nemu' ningi gili Izesu'ni ti' li li-imasine': Guvekasi ve, laza lokunivo okulumokuti' ololi'mo lemo a'mine mene aleve ngebele gese' ilive lo nogelabe. 55 Ne'mine lasine'za Izesu' aza mine velepe' izo ngelemine'. 56 Ne'mine ogavo numuno ebe' gohi mala vani'.

Izesu'ni E'metaatoti' Geni Soto' Ilingumu' Lo-ngimine' Gamazi

(Mataio' 8:19-22)

57 Akalo' nivavo ve mali'mo Izesu'ni ti' lo lo-imine': Naza nene gei' vilinida alinida ha ge'meto volosuve. 58 Ne'mine lavo Izesu' ti' lo lo-imine': Inite' muki' loposo gulosi ido' namasi nene ingalizani' numu'inesi minaa' nani'za O'mosolati' ve gihile neni' ongalo numu'ne nene nomine' nenako ha ne'metelibe. 59 Ido' ne'mine lo ve mamu' nene ne'meto ano lo-dine'za aza ti' lo Izesu'ni lo-imine': Guvekasi ve, gaza gele nemanivo me'nehine vo do galese ize-dosa ogo ge'metelove lo line'za 60 Izesu' aza ti' lo lo-imine': Gaza gelezo. Lu'ine hele vive angise nete hililiza oko'ine nene di galese izi minilisaze. Gaza nene vo O'moso'mo gizebo o-ledelingumu' gamazi nene lo soto' soto' ozo. 61 Ido' ve ma ne'mo ti' lo lo-imine': Guvekasi ve, nazasi nene ge'metelesuze. Gaza gele nemanivo neze aleve nene vo a'nido' do mo minilo lo alove. 62 Ne'mine lavo Izesu' ti' lo lo-imine': Evene' ma ingine gono di di nivilizanguti' velepe' izi mehe'nida ningaa' nave nete nene O'moso'mo gizebo o-ledelingumu' ve li gono dalizado' nene lisihe' isa'mave.